آخشام چاغی دوشونجه نین یولون آچ
آیاق گوتور یاواش یاواش دیله گل
اسیر دوشن یارپاقلارین قولون آچ
ساز قوینوندا بم دن ائنیب زیله گل

اوره یینه دومان قالا چن قالا
قویما یانسین بو فه له گیین الینده
دوداغ دوداغ دویغولاری چالخالا
شعیره دول قیزیل گولون دیلینده

یازیمیزی قارا یازیب یازاندا
گئجه یاری یارلیغیمیز یاریلیر
سون باهارلی یارا یازیب یازاندا
آل سئوگیمیز قارانلیغا ساریلیر

اللریمیز دویون توشوب بلکه ده
آچانمیریق بو دوگونو اوزوموز
بیله بیله سئویشیریک کولگه ده
آلیشیریق کوله دونور کوزوموز

یاشیل لیغیم یاز قوینوندا سارالدی
ایندی بوتون بوداقلاریم قاردی گل
گوزوم یولا باخا باخا قارالدی
فاصیله لر سئوگیمیزی یاردی گل

یاساقدیرسا اوره گیمده قالاجاق
بو قارا گون سئوگیمیزین چیچه گی
ایللربویو منی درده سالاجاق
خیالیمدا به نووشه نین له چه گی

"دومان"